ممكن تسمعوني ؟؟؟معلش انا عايزة اتكلم

--------------------------------------------------------------------------------

أفك عن نفسى ؟ ..

طب وبعدين ؟

هيجيب نتيجه ؟ ..

طيب هفك عن نفسى ازاى ؟..بانى اتكلم

طيب ما انا من زمان عمال اتكلم واصرخ ومحدش سامعنى ..واللى يسمعنى يعمل حاجه من اتنين ..يا يوافقنى على كلامى لانه زيى ..يا اما يبلم لانه مش لاقى حل ..

طيب عاوز تعرف فيا ايه ؟..

عارف لما تحس ان بكره هتلاقيه ضلمه ؟

مش عارف تتوقعه حلو ابدا ؟..

عارف لما تحس ان حد قصقصلك جناحاتك وبيقلك يلا طير ؟

عارف لما تكون مش عارف تحلم ؟ اصلك هتبقى عبيط لو حلمت .. اصل لو حلمت هتحلم بحاجه من اتنين ..يا اما حلم خيالى ..يا اما بتحلم بغد مشرق وانا بقلك ضلمه ..يبقى هتبقى عبيط ولا لا؟

عارف لما تبقى كل أملك ومناك هيا العباره ديه - ضاقت لما استحكمت حلقاتها فرجت وكنت اظنها لا تفرج - ..بس دى بقت ضيقه قوى ..بس أهو مستنى الفرج ..

طب عارف لما تحس انك شهم وقوى وعاوز تقاوم وتصحح الاوضاع وتلاقى كل الناس بتقولك متحاولش ..قبلك حاولو وفشلو ..وديه كانت نتيجه فشلهم - ويشاورولك على النتيجه ..ويا اما مرميين فى معتقل يا اما عملو عمليه ارهابيه عشان يموتو نفسهم ويموتو الناس يا اما جالهم لا مبالاه وبقت السمى الاساسيه بتاعتهم هيا كلمه " عادى " ويقولولك اصل الموضوع مالوش حل .. وهتبقى لوحدك وايد لوحدها متصقفش ؟..


طب عارف بقى لما يبقى الحل الوحيد اللى قدامك ..هو انك تبقى جنب ربنا عشان قربك منه بيديك حاجه زى بنج مش بتحسسك بالمصايب اللى حواليك ..وانت بتقرب منه وبتقرى آيات قرآنه يستوقفك جزء من الايه ديه " ان الله لا يغير ما بقوم حتى يغيرو ما بأنفسهم "..
ساعتها تقف كده وتفكر .. وتقول - هو انا مصيرى متعلق بالناس ديه ..يعنى انا لو غيرت من نفسى مش هيفيد بحاجه لان المفروض عشان يحصل تغيير لازم الكل يغير من نفسه -


طب عارف لما تحس ان اللى حواليك أغلبهم بيشدوك لتحت ويغرقوك .. وانت مش عايز تغرق وبتحاول تقب على الوش ..
والمطلوب انك تتغلب عليهم كلهم لوحدك عشان لو غرقت هتتعاقب ودا مش اى عقاب ..دا عقاب ربنا ..


طب عارف بقى لما تحس انك بتتدلع ..ومستغل الظروف اللى حواليك عشان تنام فى العسل وتشبع رغبه الكسل اللى عندك ؟

طب عارف لما تحس انك انت الشماعه اللى بيتعلق عليها الغلط اللى انت مش بتكون قاصد تعمله ..والغلط الاساسى على ناس تانيه وهما السبب فيه ؟


طب عارف بقى لما رسولك يقول فيما معنى حديثه " فى اخر الزمان القابض على دينه كالقابض على قطعه من جمر "

اه كده انا حسيت ان حد سمعنى ..وحس بيا - تشبيه مش هقول بليغ لانها كلمه قليله ..كفايه انه من محمد - نبينا الأمي - سبحان من علمه ..


طب عارف لما رسولك برده يقول فيما معنى حديثه ان فى اخر الزمان اللى يتمسك بدينه هيكون ليه أجر خمسين صحابى


ياااااااااااااااه كده سمعنى وسمعنى وحس بيا بجد وقدر اللى انا فيه .. بدليل ان المكافئه مفيش أعظم منها ..ودا يدل على انى اكيد هبزل مجهود كبير جدا عشان استحق المكافئه ديه ..



كلمه أخيره ..

ياللى حاسس بمر الزمن ..خلى حلاوه الايمان تحليه ..

ولو كنت انت اللى بتدفع التمن .. ادعى للى كان السبب ربنا يهديه ..

ومتستغربش هو دا آخر الزمن .. وربك لما بيحب حد بيبتليه ..

ولو اليأس جوا قلبك اترسم .. بعزيمتك وارادتك امحيه ..

دا ربك اللى أوجدك من العدم .. قادر يهون عليك اللى انت فيه ..

بس ادعى انت وقول يارب الامم .. ثبت قلبى وما تخلى الشيطان يغويه ..



ومعلش كنت عايزه اتكلم

لا مش مسوداها الفكرة في الموضوع الاخر بيبين ليك ان فيه امل في دينا وهو ده المهم مش الظروف والمشاكل وكل ده والحزن المسيطر بيبن ان فيه حاجات متجاهلينها وباصيين للفرعيات ونسينا دينا وكلام رسولنا صلى الله عليه وسلم

اكيد استريحت مش معاكوا في اجمل منتدى حب