تعالوا نتخيل ..مجرد تخيل ..إن الحرم فى مصر...أيوه الحرم..هو مش كان ممكن ربنا يخلى الحرم عندنا مش فى السعودية
أولا..ماكنش هيبقى فيه الزحمة دى فى الحرم..ليه..لأن مصر كانت هتفرض ضرايب باهظة على أسعار تأشيرات العمرة والحج..وطبعا فلوس التأشيرات دى هتروح لأى حبشتكانات من حبشتكاناتهم الحكومية..تحسين البنية التحتية..دعم السكك الحديدية..المهم إن الشعب الغلبان ده ماكنش هيشم ريحة الفلوس دى
تانى حاجة..أنهم كانوا هيخلوا دخول الحرم بتذاكر زى دخول الهرم..ومش بعيد يفتحوه للسياح عشان يتصوروا فيه..وساعتهاكانوا هيمنعواى دخول المصريين عشان السياح بيقرفوا من مناظرهم ..وكمان المصريين هيفضحونا ويعاكسوهم والعيال تقولهم جيف مى بقشيش يا خواجة
وكمان ممكن يخلوه بميعاد زى الهيئات الحكومية ويخلوه من9ل2ويقفلوه الجمعة والسبت..وطبعا هيبقى زى أى حاجة حكومة فيها إهمال وفساد ورشاوى..وعشان تبوس الحجر الأسود لازم تباظى العسكرى الواقف بعشرين جنية
لكن المصيبة الكبيرة انهم ممكن يطلعولنا فيها ويقولوا إن الحرم بيخسر وان الحكومة بتتحمل مليارات الجنيهات لدعمه..وعشان كده لازم نخصصخصه ونبيعة..وطبعا هيتباع بربع تمنه..وأكيد هيتباع لمجموعة مستثمرين من جنسيات مختلفة كلها إسرائيلية وساعتها هيقولوا إن مبانى الحرم متهالكة وعشان كدة لازم ننقله بره البلد على طريق أبيس ونشتفاد بموقعه ونعمل فندق سياحى سبع نجوم عشان ننشط السياحة
لكن كل ده ماكانش هيخوفنى فى حاجة ..لكن الى كان هيخوفنى بجد هو صورة مين اللى كانت هتبقى متعلقة على جدران الحرم
..أكيد مش صورة الريس متقال
الجمعة سبتمبر 05, 2008 12:47 am