أحلى حاجة في الدنيا دي .. انك تبقى عيل .. أيوه عيل .. تعمل اللي انت عايزه و ما حدش يقدر يقولك حاجة .. ليه بقى ؟؟ أصل انت عيل .. يعني مثلا .. ممكن تشتم أي حد .. أي حد .. و لا يهمك و لو اتمسكت هتقولهم ده أنا عيل و ما فهمش .. و لو حد عمل عقله بعقلك هيقولوله ..أنت هتعمل عقلك بعقل عيل ؟؟. و قديما قالت الحكمة اليونانية . " تحب تهزق راجل هاتله واحده ست تهزقه .. تحب تهزق واحده ست هاتلها عيل يهزقها " و هكذا نجد بما لا يدع مجالا للشك أن أقوى الفئات البشرية على الاطلاق همه .... العــــــــيــــــــــال ...
إذ أنه ..أقوى الرجال يستجيب لضغوط زوجته و أوامرها .. و أدهى النساء ترضخ لضغوط عيالها .. و من ثم يأتي على هرم توزيع القوى البشرية .... العــــــــيــــــــــال ...
و على رأي أبلة فضيلة .. انه حقا عالم أطفال .. أطفال .. طبعا عيال عن عيال تفرق .. فيه عيال الشوارع ( اللي تحت كوبري الملك الصالح ) .. اللي تقرف تبصلهم .
لكن برضه فيه عيال النوادي .. اللي بيلعبو جيت سكي على شواطئ مارينا و بيكلو آيس كريم من باسكن روبنز .. و بيلعبو مراجيح في ديزني لاند باريس
من ناحيتي أنا فأنا طول عمري كنت بقول ليه يا رب خلتني من نوع العيال الأولاني .. أصحاب الطفولة المشردة من لعب البلي في التراب و شد الكبس .. و الاستحمام بالماء القذر الذي كانت تدلقه علينا سيدة شارعنا الأولى الحاجة أم كورية لكي نبتعد عن اللعب من أمام بيتها .
و في أحيان كتير كنت اقعد أعيط و أقوله يا رب ما خلتنيش تامر أحمد عز أو هيثم محمد أبو العينين و لا حتى برعي كمال الشاذلي .. أهي عيشة و السلام و بدل ما اكون بحب البت سوسن المقملة المعفنة الجربانة اللي ساكنة تحتينا كنت حبقى بحب مي أحمد بهجت و لا هنا فريد حسنين .. حاجة أيه ترد الروح
لكن بعد ان شاهدت مباراة برشلونة الأخيرة .. و رأيت ذلك الطفل البرئ الجميل الجالس على قدمي الرئيس و هو يوشوشه في اذنه مشيرا الكرسي الجالس عليه .. رئيس وزراء أكبر دولة في المنطقة .. و نائب رئيسها بمنطوق التعديلات الجديدة .. الدكتور أحمد نظيف .. فيقوم الرجل بمنتهى الطواعية و الأدب عن كرسيه و يتنازل عنه في إيثار عجيب لهذا الطفل الجميل .. و يجلس هو خلفه في منتهى الاحترام .. شعرت بعدها بالأسى و الحزن على أننا لا نختار أبائنا و أجدادنا ..
و قمت من فوري و أنزلت صورة جدي من على الحائط و ألقيت بها في صفيحة الزبالة .. ثم وضعت بدلا منها صورة أكثر وسامة و احتراما و نظرت الى صاحبها في مودة تعتريها الحسرة و أنا أقول..
ليه انت ما طلعتش جدوووووووووو ؟!؟!
الجمعة سبتمبر 05, 2008 12:32 am
