الا الكابوس ده بيحصل بجد فعلا؟؟؟؟؟؟؟؟؟؟؟؟؟؟؟؟

المشهد الأول - كابوس رقم 1:

نهار داخلي..حجرة أحد الطلبة الفاشلين..ليلة الأمتحان..قبل الفجر:

فاكر إن لسه بدري ع الأمتحان.. وطبعاً لسه مذكرتش حاجة ولا فتحت كتاب.. وفجأة .. ألقي في روعي -وماتقولش يعني إيه روعي؟- إن فاضل كام ساعة ع الأمتحان .. يا نهار أسود..مرة واحدة كده؟؟ .. ده أنا لسه ما ذاكرتش .. حاولت أقرأ أي حاجة بسرعة .. بس القراية بطيئة .. والكلام كتيييير .. والوقت بيجري بسرعة .. وأنا بنهج .. ونفسي بيروح .. وعايز أصرخ .. أصرخ...

لأاااااه ه....... (cut)

أصحا من النوم مفزوعاً لأجد أن الأمتحان لسه مجاش!!.

المشهد الثاني - كابوس رقم 2 :

برضه نهار بس خارجي المره دي .. راكب المشروع والسواق راجل عجوز .. دايس ع البنزين بطرطوفة صوبع رجله الصغير وعمال يكحكح وشكله بيموت أساساً .. عداد السرعة بيقرا 3 متر في الساعة .. وأنا بصرخ يا عم: أسرع أبوس رجلك فاضل خمس دقايق ع الأمتحان .. الوقت بيجري .. أنزل م المشروع وأقعد أجري في الشارع .. أجري .. لكن رجلي ما بتجريش .. والأسفلت بيتحــول لرملة .. ورجلي بتغرز في الرملــة .. وبنهج .. بنهج .. ونفســي بيــروح .. وبصرخ .. بصرخ .. لأاااااااااه ه ......(cut)

أصحا من النوم مفجوعاً لأجد أن "برضه الأمتحان لسه ما جــاش"!.

المشهد الثالث - كابوس رقم 3 :

نهار داخلــي .. نفس الحجرة بتاعة كابوس رقم 1 .. نايم على السرير غارق فــي نوم عميق .. وفجأة يرن جرس المنبه .. أصـحو مفزوعاً على صــوته المزعج .. أنظر في الساعة .. يا نهار أسود الساعة 12 .. ده أنا أمتحاني الساعة 9 .. أنا كده الأمتحان فاتني .. أنا سقطت .. صدري بيضيق ..نفسي بيروح .. عايز أصــرخ .. أصــرخ ..لأااااااااااه ه .......(cut).. زي كل مرة طلعت فطشة

المشهد الرابع - كابوس رقم 4 :

نهار خارجي .. بجري جوه كليتي عشان ألحق الأمتحان لكن المرة دي كنت عارف ميعاد الأمتحان .. ومارحتش عليا نومة ..ولا أتأخرت ع الأمتحان .. كل حاجة المرة دي ماشية مظبوط ..

وصلت إلى اللجنة في هدوء .. تركت حاجتي ع الباب واقتربت منها ولسه هدخل لقيت المراقب بيقولي:

- رايح فين يا كابتن؟؟

- هي مش دي كلية تجارة؟؟

- أيوة

- امتحان المحاسبة سنة تالتة

- تمام ..

- طيب عايز أدخل

- لا.. تدخل فين؟؟ .. (ثم يبتسم ابتسامة صفراء) ثم قال : مفيش مكان

- مفيش إيه؟؟!!!!

- مفيش مكان..

- إيه الجنان ده؟؟ .. هو انا بركب مشروع عشان تقولي مفيش مكان؟؟

- مشروع .. أتوبيس .. قولتلك مفيش مكان ..يعني مفيش مكان

- يا عم ده أنا معايا رقم جلوس

- والله لو معاك بسبور..برضه مفيش مكان

- طب أروح دلوقتي ولا أعمل إيه

- أطلع على مبنى العميد يمكن تلاقيلك مكان هناك

أخدتها جري وطلعت على مبنى العميد .. لقيت أمة لا إله إلا الله واقفة

- إيه يا جدعان .. هو إيه النظام؟؟

- والله مستنيين

- مستنيين إيه بالظبط؟؟

- مستنيين أي حد يخلّص عشان حد يخش مكانه

- إيه يا جدعان .. هية ميضة؟؟ .. ده امتحان .. يعني ممكن محدش يخرج إلا في آخر الوقت

- والله أدينا مستنيين .. أدعي بس أنت ربنا يسهل للي جوه..

وأخذ الجميع يهتف في صوت واحد .. يا لطيف .. يا لطيف.. وبعد كتير من الدعاء ولاابتهالات مثل يا مسهل سهلها .. وانتعهم بالسلامة يا رب .. وبعد مرور معظم الوقت .. ربنا سهل لواحد ودخلت أنا مكانه .. كتبت اسمي على ورقة الإجابة ورقم جلوسي ولسه حقول يا هادي لقيت اللي يقولي "ضع القلم" ..بيني وبينكم أنا كنت عايز أضع القلم في عينه .. لكن استخسرت القلم .. قعدت أنهج .. ونفسي يروح .. وأصرخ .. أصرخ .. لأااااه ه.. لكن محدش قال: (cut) .. ولا صحيت م النوم .. ذلك لأنه كان بالفعل كابوس حقيقي.

ياحبيبتي انتي اللي ثانكس بجد لاهتمامك بالمواضيع
بجد يكفي ردك عليا واهتمامك